To av tre spurde i ei ny meiningsmåling seier dei er nøgde med matvareutvalet i nærbutikken sin. Berre 13 prosent er misnøgde.
Svara kjem fram i distriktsbarometeret til Nationen og viser at folk i Midt-Noreg og på Austlandet er mest nøgde med vareutvalet i butikkane sine, medan kundar i Nord-Noreg og på Vestlandet er noko mindre nøgde.
Heile 67 prosent i undersøkinga svarar at dei er svært eller noko nøgde med vareutvalet, medan til saman 13 prosent svarte at dei er svært eller noe misnøgd. 19 prosent svarer både og på spørsmålet.
Mest nøgde er kundar som bur i ein by med mellom 5.000 og 50.000 innbyggjarar.
Svara på undersøkinga til Nationen gjev eit heilt anna inntrykk enn undersøkingane til Matkjedeutvalet, som gav inntrykk av eit stort behov for betre utval.
Leiar i utvalet, Einar Steensnæs, meiner likevel at skilnaden kan forklarast ved at kundane er førebudde på at nærbutikkane har eit avgrensa vareutval i utgangspunktet og difor har svart slik dei gjorde. (NPK/NTB)
