Skodespelar Heidi Gjermundsen Broch fekk søndag Heddaprisen for beste kvinnelege hovudrolle som Diana i Next To Normal.
Next To Normal har gått på Det Norske Teatret sidan hausten 2010, og Gjermundsen Broch fekk prisen med følgjande grunngjeving:
– Årets vinnar har, gjennom si gripande, finstemte og djupt menneskelege tolking av den bipolare amerikanske husmora Diana i Next to Normal på Det Norske Teatret, gitt det definitive beviset på at musikkteater kan vere stor scenekunst.
Heidi Gjermundsen Broch er 36 år og har vore tilsett ved Det Norske Teatret sidan 2000.
Prisen for beste regi gjekk til Peer Perez Øian for regien på stykket Sjuk ungdom. Juryen peiker på regissørens evne til å leie skodespelarane til særprega og distinkte enkeltprestasjonar, samstundes som dei også presterer ensemblespel på høgt nivå. Sjuk ungdom føregår i Wien i perioden mellom 1. og 2. verdskrig, og stykket er skrive av Ferdinand Brückner.
Hedda-prisen vert delt ut årleg for framståande prestasjonar innafor norsk scenekunst. Prisen vart delt ut første gong i 1998.
I tilknyting til utdelinga av Hedda-prisen vert også Aksel waldemars minnepris delt ut. Prisen skal gå til ein bilet-kunstnar og til ein person som har gjort ein særleg insats for nynorsk secenkunst. I år gjekk prisen til bilet-kunstnar Arne revheim og dramaturg Ola E. Bø.
