Ei oversikt syner at tre av fire kommunar som tek i mot flyktningar bruker meir pengar på flyktningane enn dei får i statlege tilskot, skriv Klassekampen. Men i Flora kommune går flyktningrekneskapen i pluss.
Kommunane får tilskot frå staten for kvar flyktning i fem år, og desse pengane skal dekkja busetting og integrering av flyktningane i samfunnet. For mange kommunar går ikkje rekneskapen opp, syner ei oversikt frå Integrerings- og mangfaldsdirektoratet (Imdi).
LES OGSÅ: Fleire kommunar vil ta imot flyktningar
I Flora kommune i Sogn og Fjordane har dei løyst utfordringa på anna vis og går faktisk i pluss på å ta imot og integrera flyktningar.
Kommunen organiserer alle tiltak retta mot flyktningar i eit eige kommunalt føretak. Alle tilskota frå staten går inn i dette føretaket, som fordeler pengar til norskopplæring, barnehage og andre integreringstiltak. Når pengane er fordelte, sit kommunen igjen med eit stort overskot.
Etter at tilskotet i fjor var fordelt, kunne det kommunale flyktningføretaket fordela 5,7 millionar kroner til andre føremål, skriv Klassekampen. (©NPK)
Innlegg: Å visa hjarterom
