I alt 74,7 prosent av veljarane i Noreg seier nei til norsk medlemskap i EU. Berre 15,2 prosent vil at Noreg skal bli medlem av EU.
Neisida held dermed på det rekordsterke fleirtalet i befolkninga som dei har hatt sidan årsskiftet, viser aprilmålinga frå Sentio, som er laga for Klassekampen og Nationen.
Ein ny trend er at EU-motstanden no også femnar svært breitt. EU-motstanden har tradisjonelt vore sterkast i låginntektsgruppene, i distrikta og blant kvinner. Men no er 71 prosent av dei som tener over ein million i året, motstandarar av norsk EU-medlemskap.
Neivinden blåser også sterkt i Frp. I januar sa 79 prosent av Frp-veljarane nei til EU. No seier 90 prosent nei. Det gjer at Frp er blant dei sterkaste neipartia, på linje med Kristeleg Folkeparti, der 91 prosent seier nei, og Raudt, der 89 prosent seier nei. I Senterpartiet seier alle dei spurde nei til EU.
EU er mest populært hos Venstre-veljarane. Der seier 34 prosent ja, følgt av Høgre med 26 prosent og Sosialistisk Venstreparti med 22 prosent ja.
Geografisk er Oslo minst EU-kritisk, med 24 prosent ja og 67 prosent nei. (NPK)
