Kommunane langs rv. 13 er ikkje attraktive nok for tilflyttarar og slit i varierande grad med dårleg folketalsutvikling.
Det slo prosjektleiar i IS Fjordvegen Harald H. Løland fast under kultur- og samferdslekonferansen Vegen vidare i Balestrand i dag.
Løland viste til undersøkingar gjort av Telemarksforsking som syner at lang avstand til større arbeidsplassar er ein av dei største bremsene i høve tilflytting.
Samstundes er det grunn til optimisme, understrekar Løland.
Kommunane langs rv. 13 har høgare vekst enn landsgjennomsnittet i privat og offentleg sektor.
– Betre kommunikasjon gjer kommunane meir attraktive og det gir ringverknader i høve busetnad og vekst i nye arbeidsplassar, seier Løland.
IS Fjordvegen har prioritert å jobbe for tunnel over Vikafjellet, Vossapakken, Oddapakken, Hardangerbrua og Sandsfjord bru i tillegg til ulike rassikringstiltak.
