Landet er styrt av to parti som gjekk til val på å gjere sidemålsundervisninga frivillig. Det treng ikkje vere eit problem, seier Sveinung Rotevatn til Norsk Tidend.
Midt i forhandlingane om ei felles regjering mellom Venstre, KrF, Frp og Høgre sa Per Sandberg, nestleiar i Frp, at ”nynorsk vil ikkje vere den saka som vil felle ei regjering”. No hamna ikkje Venstre i regjering, men vart i staden eit støtteparti i Stortinget. Venstre har programfesta ein solid målpolitikk, og både leiar Trine Skei Grande og nestleiar Ola Elvestuen har forsikra urolege målfolk om at nynorsk er like viktig no som det var før valet, skriv Norsk Tidend.
Nynorsken er også viktig for Sveinung Rotevatn, nyslått stortingsrepresentant for Venstre og Sogn og Fjordane. Og styremedlem i Noregs Mållag.
Les også: Ideologisk musikant
– Eg kjem med den bagasjen eg har, seier Rotevatn.
– Eg har bakgrunnen min frå heimfylket mitt Sogn og Fjordane, og frå dei organisasjonane eg har valt å engasjere meg i. Eg snakka også mykje målsaka i valkampen, så eg trur ikkje veljarane skal vere overraska over kva eg kjem til å vere oppteken av. Venstre har eit godt program, og eg trur dette gjev meg ei god plattform.
– Blir du målrørsla sin mann på tinget?
– Eg representerer fyrst og fremst fylket mitt, men eg er definitivt tilsnakkande.
