Vindkraftanlegg må få strengare konsesjonskrav for å redusere fugledød, meiner fugleforskar.
Både Noreg og resten av Europa står føre omfattande utbygging av klimavennleg vindkraft. Men målet om reduserte utslepp av klimagassar kan kome i konflikt med andre miljøomsyn, som naturmangfald og fugleliv.
Seniorforskar Kjetil Bevanger ved Norsk institutt for naturforskning (NINA) ønskjer strengare konsesjonskrav til forundersøkingar for nye vindkraftanlegg, for å redusere konfliktane.
– Fugledøden ved vindkraftanlegg kan reduserast mykje med riktig plassering av turbinane. Det krev kunnskap. Krav om skikkelege konsekvensanalysar må inn i konsesjonsvilkåra for nye vindkraftanlegg, seier han.
– Vi har lovverket som trengst. Det er opp til styresmaktene å stille krav til kva for forundersøkingar ein utbyggjar må gjere før dei får konsesjon. I dag møter Statkraft strengare krav til ei vindkraftutbygging i Tyskland enn dei gjer i Noreg. (©NPK)
