I ei fersk undersøking svarar berre 16 prosent av ordførarane her i landet at dei trur deira kommune blir frivillig samanslått.
Det er 12 prosentpoeng færre enn for tre månader sidan, skriv Nationen. I deira ordførarundersøking, der 266 ordførarar har svart, seier berre 43 ordførarar at dei trur det blir ei frivillig samanslåing i deira kommune.
På den andre sida svarar 150 ordførarar – 56 prosent av dei spurde – at det ikkje kjem til å ende med frivillig samanslåing for deira kommune. Denne delen har auka frå 46 prosent i mars.
Ein av ordførarane som har snudd, er Kristin Maurstad (Ap) i Vågsøy i Sogn og Fjordane. Ho forklarar det blant anna med at forslaget til inntektssystem frå regjeringa vart endra.
– Eg ser framleis at fordelane ved ei samanslåing er store, men ulempene ved å stå åleine er blitt mindre, seier Maurstad.
Fristen for å fatte vedtak om frivillig samanslåing er 1. juli. (©NPK)
