Fylkesmann Helen Bjørnøy i Buskerud vil redusere dei 21 kommunane i fylket til seks eller ni nye kommunar.
Anbefalingane vart sendt ut til kommunane 2. mai. Fleire har meint at den tidlegare miljøvernministeren frå SV truar dei saman, skriv Klassekampen.
Fylkesmannen vil ha ein ny storkommune rundt Drammen, samanslåing mellom Kongsberg og naboane og ein storkoalisjon i Hallingdalen. Fleire stadar anbefaler ho samanslåing der kommunane sjølv har vedtatt at dei vil stå åleine, mange av dei etter folkeavstemming.
Bjørnøy forklarar at anbefalingane er laga etter to år med dialog med kommunane.
– Eg har valt å gi ei førebels skisse ut ifrå vedtak som kommunane førebels har fatta og hensikta med reforma, seier ho. Fylkesmannen seier kommunane må grunngi vedtaka sine ut ifrå dei fire måla regjeringa har sett for reforma.
Kommunane skal no vurdere demografi, kompetanse, sårbare grupper og korleis dei tenkjer å få til ei overordna samfunnsutvikling når kommunane gror saman. (©NPK)
