Nyheitsanker Morten Sandøy får Kringkastingsprisen 2011 for den aktive bruken sin av nynorsk i sendingane til TV 2.
Juryen i Kringkastingsringen meiner at Morten Sandøy har hatt ansvaret for at nyheitsspråket i TV 2 har fått eit nynorsk preg over seg.
– Det er hyggjeleg å bli lagt merke til i den forstand at det er ein fagleg pris. Eg tolkar det like mykje som ei påskjønning for eit godt språk, som å bruka nynorsk eller bokmål, seier prisvinnaren til TV 2 .
Morten Sandøy har vore i TV 2 sidan oppstarten i 1992, og har vore anker i nyheitssendingane, utanriksreporter og programleiar i Lørdagsmagasinet. (NPK)
