Kommunestyret i Tysvær kommune har no gått inn for at kommunen skal bli språknøytral. Ei sak det er delte meiningar om.
– Tysvær Bygdeblad er ei nynorskavis. Me bruker det både som ein del av aviskulturen i kommunen og som eit tydeleg image på ei lokalavis. Men me vil vere slik folket er, og det inneber at nokre av sakene våre kvar veke er på bokmål og at me prøver å oppdatere oss på den nynorsken som folk flest kan forstå og ikkje bli provosert av. Det er også eit tips til Tysvær kommune, skriv lokalavisa på leiarplass.
Les også: Meiner kommunen burde vore språknøytral
Denne veka vart det klart at kommunestyret med 16 mot 13 røyster gjekk inn for at kommunen skulle bli språknøytral.
– Men det er lett å forstå skeptikarane. Nynorsken er i ferd med å forsvinne frå Tysvær. Me ser det i skulen og me ser det nå altså i det offentlege styringsapparatet. Å frykte at nynorsken er vekke om eit par år, er faktisk ein relevant frykt, held ein fram på leiarplass.
Barnehagesjef i kommunen, Anne Lise Myrvoll, er ein av dei som sjølv er bokmålsbrukar og som no meiner det blir ein enklare kvardag.
– Dette betyr at eg no kan skrive mine planar på bokmål, det er betre enn å bruke tid på å skrive nynorsk som ikkje blir særleg bra, seier ho og legg vekt på at ho har hatt behov for mykje hjelp for å få nynorsktekstane på plass.
– Har de fått tilbod om kurs i bruk av nynorsk?
– Me har ikkje hatt kurs nei, men eg har absolutt fått den hjelpa eg har hatt behov for. Uansett blir dette enklare, meiner ho.
