Ved St. Hallvard videregående skole i Lier går dei nye vegar i nynorskundervisninga.
Det var lærar Liv Marie Schou som fann ut av Facebook kunne brukast i undervisninga for å løfte opp nynorskundervisninga.
– Elevane må skrive for å lære nynorsk. Kor skriv dei? Jau, dei skriv på Facebook. DER hadde eg planen klar. Eg vart lykkeleg og glad og mest dansa inn i klasserommet. Å be elevane slå på PC-ane er ikkje nødvendig, dei er allereie i status «on» og har blikket stivt inn i skjermane når eg kjem inn og stiller meg bak kateteret, skriv ho på bloggen sin.
– Raskt er alle i Facebook-modus, eg ber dei oppdatere profilane sin på nynorsk. Dette vekte interesse og dempa jubel. Eg ville overdrive ved å seie at det vart stormande applaus, men ei større interesse enn eg er van med å få heilt i byrjinga av nynorsktimane mine, det var det. Dei fleste var opptatte av å formulere seg godt og skrive riktig grammatikalsk. Med eitt var mange hender oppe og ville ha hjelp; «er dette riktig, kan eg skrive det på nynorsk?» Eg gjekk frå elev til elev og hjalp til med å finne det rette ordet, den gode setningen, det rette uttrykket, held ho fram.
Les bloggen til Liv Marie Schou her.
