Dersom arbeidet med dei digitale ordbøkene vert flytta frå Universitetet i Oslo, flyttar pengane etter, fastslår Kulturdepartementet.
Det er usikkert kva som skjer med prosjektet og finansieringa når prosjektet Norsk Ordbok 2014 formelt vert lagt ned i februar neste år. Prosjektet er drive av Universitetet i Oslo (UiO), og Kulturdepartementet har bede om eit overslag over kostnadene for å halda ved lag ei minimumsløysing framover.
Uniform skriv at departementet ikkje er nøgd med svaret og trur universitetet har misforstått spørsmålet.
I eit brev blir det uttrykt misnøye med at UiO svarer at kostnadene vanskeleg kunne fastsetjast «no», ettersom det ikkje går klart fram om universitetet vil koma tilbake til spørsmålet seinare.
Departementet presiserer at det ikkje vil ta ansvar for oppgåver universitetet ikkje lenger tek seg av. Det vert gjenteke endå klårare at dersom Kulturdepartementet skal bidra til å finna organisatoriske løysingar utanfor universitet, må pengane følgja oppgåvene. (©NPK)
