Norsklærarane meiner i mange høve det er best for innvandrarane å få norskundervisning på bokmål, sjølv om dei bur i ein nynorskkommune, skriv NRK Sogn og Fjordane.
Sju av 26 kommunar i Sogn og Fjordane brukar berre bokmål i norskundervisninga av innvandrarar. Lærarane meiner det er for lite læreverk på nynorsk og peikar på at fleire av innvandrarane flyttar austover, skriv NRK Sogn og Fjordane.
Flora er ein av kommunane som berre tilbyr undervisning på bokmål, noko mange av elevane også ynskjer.
– Eg har prøvd å lære nynorsk, men det er veldig vanskeleg. Eg prøver og prøver, men nei. Bokmål det er betre, seier ei ung kvinne til NRK Sogn og Fjordane.
– Dei får plass i kommunar i Nord-Norge, på Austlandet og andre plassar, og det viser seg jo at verda er slik laga at dei fleste andre kommunar har bokmål. Dermed trur vi at våre elevar er best tente med å ha bokmål som opplæringsspråk, seier lærar Kari Ann Søreide.
13 kommunar i fylket har derimot norskundervisninga på nynorsk. Noko Steinar Myrekrok i Førde Norsksenter er positiv til.
– Når dei møter det same språket på skulen som dei møter på butikken, på eit offentleg kontor eller hos naboen, så er det ikkje så unaturleg at det går kjappare og dei lærer språket betre, seier Myrekrok til NRK.
