Den tradisjonsrike norske teikneserien «Vangsgutane» er no komen ut på den amerikanske marknaden.
Under tittelen «The Boys From Vangen» skal teikneserien no glede amerikanske lesarar. Boka kjem i ein kombinert engelsk/norsk omsetjing, der halve sida er med engelsk tekst, og den andre halvdelen er på norsk.
«Vangsgutane» vart først utgitt i Nynorsk Vekeblad frå 1940 til 1954. Serien har kapra ein plass i hjartet til fleire som julehefte. Leif Halse skapte historia, som gjer lesarane kjende med ein meir «moralsk» versjon av Knoll og Tott.
Teikneserien skulle nemleg ha hovudpersonar som kunne vere førebilete. Dermed vart det to gutar, Steinar og Kåre, som ikkje berre gjorde rampestrekar, men som også tok ansvar og jobba på garden saman med mora. (©NPK)
