Tre jenter frå Vestlandet er heidra med 5.000 kroner for skrivetalentet sitt. Dei får prisen for å ha levert dei beste hovudstilane på nynorsk til eksamen allmennfag i vidaregåande skule i fjor.
Julie Bojesen frå Sauda, Marta Rekdal Eidheim frå Ulstein og Hanne Onjeme Overvoll frå Volda klatra heilt til topps då juryen for Fridthoiv Oos`legat skulle bestemma seg for kven som i år skulle premierast for dei beste nynorskstilane.
– Prisvinnarane har alle tre felles kvalitetar. Dei skil seg ut som skribentar, dei har ein sikker språksans og ein sikker fagkompetanse, sa tidlegare redaksjonssjef i Samlaget, Svenn Fosseng, då han delte ut prisen på årsmøte til Samlaget nyleg.
Han slo fast at alle dei tre prisvinnarane har eit stort talent til å skriva.
Julie Bojesen takka for tildelinga på vegner av dei tre og understreka at prisen er svært viktig for å oppmuntra elevar på vidaregåande til å halda fram med å skriva nynorsk.
Julie Bojesen fekk tidlegare i år andrepremie i Magasinett og Framtida.no si skrivetevling «Kva framtid vil du ha?». (©NPK)
