Regjeringa varslar at dei vil forenkla byggjereglane slik at du kan byggja garasje eller uthus på inntil 50 kvadratmeter på eiga tomt – utan å spørja naboen og utan å søkja kommunen.
Det einaste kravet er at bygningen ikkje er i konflikt med reguleringsplan, veglov og at bygget er minst ein meter frå tomta til naboen, skriv VG.
– Plan- og bygningslova skal bli ei «ja-lov». Folk vil spara både tid og pengar, og kommunane kan bruka tida til å løysa andre oppgåver, og til å rettleia sjølvbyggjarane betre, seier kommunalminister Jan Tore Sanner (H) til VG.
Dei nye byggjereglane er ei av nyheitene som Sanner skal presentera på landsmøtet til Høgre i helga. Allereie neste veke legg regjeringa fram eit lovforslag som forenklar byggjesaksbehandlinga for sjølvbyggjarar.
Forslaget byggjer på reglar tidlegare kommunalminister Liv Signe Navarsete (Sp) varsla i ei stortingsmelding i 2012. Den raudgrøne regjeringa ønskte også ei liberalisering for bygg på inntil 50 kvadratmeter.
Etter regelverket i dag kan folk maksimalt byggja inntil 15 kvadratmeter minst fire meter frå tomtegrensa før det utløyser søknadsplikt. (©NPK)
