Regjeringspartia må bu seg på harde rundar i Stortinget for å få gjennom dei foreslåtte kutta i støtta til den norske mediebransjen.
Arbeidarpartiet, Kristeleg Folkeparti, Venstre, Sosialistisk Venstreparti og Senterpartiet har allereie sagt klart ifrå at dei ikkje godtar dei foreslåtte kutta.
– Det ligg no eit stort ansvar på Venstre og KrF for å få fleire enn regjeringspartia med på ei større forhandling om mediepolitikken, i Stortinget. Eg håper vi får til eit breitt forlik, seier Arbeiderpartiets mediepolitiske talsmann Arild Grande til NTB.
Han kjem med reaksjonen på dei foreslåtte kutta like etter eit møte på Stortinget torsdag med leiinga ved Institutt for Journalistikk (IJ) i Fredrikstad. Bakgrunnen for møtet var forslaget til regjeringa om å kutte 1,5 millionar kroner i statsstøtta til IJ neste år.
Det betyr at støtta går frå 5 millionar i år til 3,5 millionar kroner i 2015. I tillegg foreslår regjeringa å fjerne støtta heilt over tre år.
– I ei eventuell sak kjem vi til å søkje fleirtal for å halde oppe løyvinga, seier Arild Grande.
– Fullstendig feil
Både styreleiar Britt Sofie Hestvik og leiar Eivind Lid i IJ møtte Grande torsdag.
– I ei tid da mediebransjen allereie slit tungt, vel regjeringa å kutte vidareutdanningstilbodet, som er viktigare enn nokon gong før. Det er ei fullstendig feil prioritering. Eg håper dei snur, og at støttepartia og den raudgrøne opposisjonen kan påverke dette, seier Lid til NTB.
I 2013 vart statsstøtta redusert frå 8,5 millionar til 6 millionar kroner, og på budsjettet for i år mista instituttet 1 million til.
KrFs mediepolitiske talsmann Geir Jørgen Bekkevold seier til NTB at det nesten kan sjå ut som ei styrt avvikling. Han vil prøve å få til eit møte med IJ-leiinga så raskt som råd og vil ta det opp i stortingsgruppa si.
– Det er vanskeleg å seie kva dei praktiske konsekvensane av dette blir, men det er ingen tvil om at dette er dramatisk for oss.
IJ har det siste året vore gjennom store endringar. Staben er halvert, og kursa blir i større grad enn før haldne ute i redaksjonane. IJ har selt det gamle bygget sitt, og instituttet har flytta inn i nye lokale i Litteraturhuset i Fredrikstad.
Sjokkert
Grande er sjokkert, og Bekkevold er svært overraska over at regjeringa tar omkamp på pressestøtta.
– Det hadde eg håpt at vi skulle unngå etter dei rundane vi hadde i fjor. I den situasjonen Medie-Noreg er i i dag, så er det ikkje kutt i støtta den rette medisinen. Det kjem vi til å leggje på bordet når vi skal forhandle. Eg håper at Venstre òg er der, slik at vi saman kan unngå det kuttet, seier han.
Finanspolitisk talsmann i Venstre Terje Breivik sa til Aftenposten onsdag at han var svært forundra over at regjeringa vil ta ein omkamp på dette, og partiet kjem til å sjå på saka på nytt.
Når det gjeld forslaget om å fryse NRK-lisensen, seier Bekkevold at det er problematisk ettersom partia ventar på å få ein full gjennomgang av NRK i Stortinget.
– Det er altfor tidleg å gjere slike grep før Stortinget har hatt denne gjennomgangen. Eg hadde i det minste venta at NRK fekk kompensert for lønns- og prisveksten, seier Geir Jørgen Bekkevold. (©NPK)
