For tredje året på rad er Vegvesen.no tildelt Farmandprisen for beste nettstad i klassen for offentlege verksemder.
– Vi er kjempenøgde! Dette er verkeleg morosamt, seier web-redaktør Kristin Moe til vegvesen.no.
Ho fortel at etaten heile tida arbeider med å gjera nettsidene betre. Det siste året har sidene mellom anna fått nytt design som automatisk tilpassar seg ulike skjermstorleikar som mobil, nettbrett og desktop.
– Vi har også teke i bruk kart i større grad enn tidlegare, seier Moe. Ho nemner også den nye tenesta Køyretøyopplysningstenesta. Ved å tasta inn registreringsnummeret på bilen, kan du til dømes få opp opplysningar om når ein bil er registrert og omregistrert – noko som kan vera nyttig å sjekka når du skal kjøpa bil.
– Vi har også utvida tenesta «Søknad om førarkort» for å gjera henne meir brukarvennleg, seier Moe. (NPK)
