Samlaget satsar no på lettlestbøker på nynorsk som app.
– Lettlestbøker på nynorsk er, som alle som held på med nynorsk veit, ei mangelvare. Dette har vi lenge ønskt å gjere noko med, og draumen og planen er å lansere ein stor lettlestserie på nynorsk, slik at unge lesarar skal kunne bli stø i nynorsk, seier forlagsdirektør Samlaget Litteratur, Ragnfrid Trohaug.
Ho viser til at ei slik satsing er eit stort økonomisk løft som også krev ekstern finansiering.
– Det håper vi går, for dei små lesarane fortener gode lettlestbøker på nynorsk. Det er lite å velje mellom per i dag.
Satsar digitalt
– Det er også lite digitalt innhald for barn på nynorsk, så då tenkte vi å slå to fluger i ein smekk, nemleg lettlest- og digitalformatet. Vi er stolte over å vere av dei første som leverer innhald retta mot barn for Windows 8, i tillegg til Android og ITunes.
Både barn som skal lære å lese sjølve, og barn som ikkje kan lese sjølve, er i målgruppa.
– Kvar app kan lesast på tre ulike måtar: Ein kan høyre teksten bli opplesen, ein kan berre lese teksten, og ein kan lese teksten i «karaokefunksjon», det vil seie at ein les mens markøren går bortetter, og så kjem opplesaren i sakte fart.
Må fengje lesaren
Trohaug meiner bestemt at lettlestbøker må ha fengjande historier med enkelt språk, noko som har vore viktig når ein har gjort utvalet.
– I tillegg må bøkene vere enkle å få tak i, og dei titlane som er å få kjøpt digitalt på alle tre plattformar som eg nemnde, er enkle å få tak i. Så når folk får auga opp for at desse bøkene finst, håper og trur eg at dei går unna. Foreldre og formidlarar vil jo veldig gjerne at ungane skal bli gode og trivast med å lese, det kan desse appane hjelpe til med, slår forlagsredaktøren fast.
– Vi har både vilje og planar om meir, så no håper eg at foreldre, formidlarar og barn der ute viser at dei ønskjer slikt innhald digitalt.
