Folketalet i Vågå kommune steig i 2009 for første gong sidan 70-talet, skriv Kommunal Rapport. Det var noko av grunnen til at ordførar Rune Øygard (Ap) vart nominert til Kommuneprofilen 2009.
Øygard er inne i sin fjerde periode som Ap-ordførar i Vågå. I løpet av denne tida har oppslutninga til Ap auka frå 30 til 75 prosent, skriv Kommunal Rapport.Eit av dei største resultata av Øygard sitt arbeid er eit stabilt folketal.
Det ser ut til å bli pluss i år og forhåpentlegvis i åra som kjem. Målet vårt er å stabilisere folketalet, og me byrjar no å sjå nokre resultat av arbeidet, uttaler ordføraren til Kommunal Rapport.
Øygard haustar ros for å byggje både nettverk og omdømme i kommunen. Sjølv trekk han fram skulen, kulturskulen og meir attraktive arbeidsplassar som satsingsområde.
– Ein god skule skal freiste foreldre til å flytte hit for å bli buande, og den skal etter kvart gi ei høgare utdanna befolkning i Vågå. Fleire unge, kompetente folk vil trekkje til seg nytt næringsliv, slår Ap-ordføraren fast.
Dei andre nominerte til Kommuneprofilen 2009 er avtroppande ordførar i Sunndal, Tove-Lise Torve (Ap), kommunikasjonssjef for Full City-oppryddinga, Vivi Sævik, bystyremedlem i Oslo og nestleiar i Høgre, Erling Lae, prosjektleiar i Mandal, Siren Vetnes Johannessen, og kommunestyremedlem for Rødt i Vågsøy kommune, Geir Oldeide. Prisen går til ein kandidat som har utmerka seg i løpet av året og gjerne over fleire år.
