Ordførar i Eid Alfred Bjørlo (V) og varaordførarane i Førde og Florø frå same partiet er sterkt uroa over ei rekkje statlege tiltak som dei meiner svekkjer fylket og fører til sentralisering.
Dei tre Venstre-politikarane ber no om møte med partileiar Trine Skei Grande og stortingsgruppa for å påverka Høgre/Frp-regjeringa, fortel Firda.
I eit felles brev til partileiinga forklarer dei kva dei reagerer på.
– Årsaka til at vi no går saman om dette brevet, er at vi alle for tida opplever ei djup uro over dei mange, tilsynelatande ukoordinerte prosessane som for tida er på gang frå H/Frp-regjeringa og statlege etatar med nedbygging av statlege arbeidsplassar og kompetansemiljø, skriv dei tre.
I brevet listar dei opp ti ulike prosessar som dei reagerer på. Det gjeld mellom anna framlegget til nye politidistrikt, alarmsentralar, varsla nedlegging av skattekontor og moglege nedleggingar av flyplassar, kontoret til Fiskeridirektoratet og lensmannskontor. Samanslåing av høgskular blir også nemnd. (©NPK)
