Statsminister Jens Stoltenberg (Ap) slår fast at Vestlandet blir hardast råka dersom me får eit nytt økonomisk tilbakeslag.
– Gjeldskrisa i Europa kan utløyse eit nytt økonomisk tilbakeslag. Då vil Vestlandet bli hardast råka, sa Stoltenberg i Grieghallen i Bergen onsdag, skriv Bergens Tidende.
Statsministeren hadde då vore på tur med regjeringstoppane Kristin Halvorsen (SV) og Liv Signe Navarsete (Sp) for å høyre korleis det står til med nye arbeidsplassar i regionen.
– Finanskrisa er ikkje over. Den har berre endra karakter til auka lediggang og gjeldskrise i Europa. Dette kan utløyse eit nytt tilbakeslag. Ei slik krise vil råka særleg eksporten. Og det betyr Vestlandet, sa Stoltenberg.
I Grieghallen snakka han til representantar frå næringslivet, fagrørsla, skuleelevar og politikarar frå Vestlandet. (NPK)
