Fredag blei overnattingstala for august lagt fram, og administrerande direktør i Fjord Norge Kristian Jørgensen slå fast at turistnæringa i vestlandsfylka går mot eit toppår.
Overnattingstala for august blei lagt fram av Statistisk sentralbår (SSB) fredag, og med det kan dei åtte første månadene av reiselivsåret summerast opp.
– Eg veit at tala for september òg blir veldig gode. Vestlandet kjem til å få sitt beste turistår nokosinne, seier administrerande direktør i Fjord Norge, Kristian Jørgensen.
LES OGSÅ: Norske fjordbygder banar veg
Gode tal for Vestlandet
Fjord Norge-sjefen viser til at utanlandsveksten for hotella i dei fire vestlandsfylka er på 16 prosent til no i år, dersom ein måler mot same periode i fjor. Med det er vestlandsregionen med på å trekkje dei nasjonale tala oppover, viser han til. Også augusttala står sterkt aleine.
– Augusttala er fantastisk gode. På hotellsida er det ein vekst frå utlandet på 22,9 prosent. Eg kan ikkje hugse sist vi hadde så gode augusttal i dei åra eg har vore i Fjord Norge, fortel han.
Jørgensen viser til at det samla for hotell, campingplassar, hyttegrender og vandrarheimar i Fjord Noreg er det ein vekst frå utlandet på 13,4 prosent sett opp imot same månad i fjor, som er over den nasjonale veksten.
LES OGSÅ: Aktive feriar er i vinden
Nasjonal hotellvekst
Ser ein på landet under eitt, blei det i dei tre sommarmånadene i år registrert 7,8 millionar overnattingar ved norske hotell. Det er 662.000 fleire enn i juni, juli og august i fjor. Dette svarar til ein auke på ni prosent, ifølgje dei ferske tala frå SSB.
Talet på utanlandske overnattingar gjekk opp åtte prosent sett opp imot sommarmånadene i fjor, medan auken i norske overnattingar er på tolv prosent.
Ser ein berre på august månad var det 2,5 millionar overnattingar ved hotella i Noreg denne månaden, som er ein auke på seks prosent sett opp imot august 2014.
– Med det stadfestar augusttala endå ein rekordsommar for norske hotellovernattingar, skriv SSB.
Innanfor ferie- og fritidsovernattingar er det ein auke på 16 prosent frå august 2014 til august i år.
LES OGSÅ: Norske stavkyrkjer stadig meir populære
Vekst for camping og hytte
Også dei norske campingplassane kan notere ein vekst i august i år, sett opp imot same månad i fjor. 1,3 millionar overnattingar utgjer ein vekst på fem prosent.
For hyttegrendene blei det registrert 340.000 overnattingar i august, også det ein oppgang på fem prosent frå same månad i fjor. (©NPK)
