Surnadal Heimbygdlag meiner det er kritikkverdig at Surnadal Sparebank ikkje tilbyr nynorsk på nettbanken, skriv Driva.
Korkje Surnadal, Rindal eller Sunndal sparebankar tilbyr nynorsk på nettbanken. Deira nettleverandør tilbyr per i dag ikkje den tenesta, skriv lokalavisa Driva.
– Om ikkje Surnadal Sparebank kan gje tilbod på nynorsk, kan det bli aktuelt å oppfordre nynorskkundar om å flytta pengane til konkurrenten, seier Trygve Roaldset, leier i Surnadal Heimbygdlag.
Konkurrenten Sparebank 1 Alliansen tilbyr nynorsk på sine nettbankar. Alliansen innførte nynorsk val i nettbanken ettr eit samla krav frå nynorskbankane på Vestlandet for eit år sidan.
– Kostnaden er marginal med tanke på den forbetringa valet er for dei mange nynorskkundane vi har, seier Hans Tronstad, informasjonsdirektør i alliansen til Driva.
Tilknytinga til Surnadal Sparebank, Terra Gruppen, tilbyr ikkje nynorsk no, men vil ta opp nynorskspørsmålet til vurdering òg seier nynorsk kan kome.
