Barneombodet krev eit ungdomsparlament for heile Noreg, og ungdomsråd i alle kommunar og fylke.
15. desember legg Trond-Viggo Torgersen og resten av Ungdommens maktutgreiing fram sine forslag til korleis ungdom kan få meir innverknad i samfunnet og i kvardagen sin. I høyringssvaret går barneombod Reidar Hjermann inn for å lovfesta at alle kommunar skal ha ungdomsråd, fortel Framtida.no.
Ei undersøking frå 2010 viser at over 62 kommunar er utan medverknadsorgan for born og ungdom. Berre 16 prosent av kommunane meiner dei i stor grad høyrer på ungdom. Til samanlikning er alle kommunar pliktige å ha eldreråd.
I sitt høyringssvar krev barneombodet eit klarare språk, slik at høyringsnotat som blir sendt ut frå offentlege organ blir lettare tilgjengeleg for unge. Ombodet rår også til at det blir oppretta ei form for kompetansesenter som kan gi råd, tips og opplæring til arbeidet kommunane gjer når det gjeld medverknad frå barn og unge.
Les heile saka hos Framtida.no!
