Rådmann Øyvind Bergøy i Hjelmeland kommune meiner det er naudsynt å opne opp for at tilsette i administrasjonen ikkje må skrive nynorsk, skriv Strandbuen.
– Me har eit bastant vedtak om at Hjelmeland kommune skal vere ein nynorskkommune. Dette er enkelt for meg som har ein målpris hengjande på veggen, men i kvardagen er det ikkje så enkelt å gjennomføra. Me får inn folk som ikkje beherskar nynorsk, og i ein travel kvardag hadde det av pragmatiske årsaker vore greitt med litt lempeleg praktisering. Det går mange kostbare timeverk til dette, både for dei som slit så godt dei kan for å skrive nynorsk og for dei som i etterkant må opptre med raudblyanten, seier Bergøy til lokalavisa Strandbuen.
Og han får støtte frå politikarane i formannskapet.
– Det ligg langt inne for meg å gå vekk frå at Hjelmeland skal vere ein nynorskkommune, men det går sjølvsagt an å drøfte praktiseringa. Eg set meir pris på ei saksutgreiing på eit godt språk – anten det er bokmål eller nynorsk – i staden for å få tilsendt skriv på dårleg nynorsk, uttaler Arne Kleppa (Sp) til Strandbuen.
