Det sa leiar i Noregs Mållag, Håvard B. Øvregård, i leiartalen til årsmøtet fredag.
– Vaksne trur gjerne at ungar lærer like treigt som dei sjølve. Og så fôrar dei ungane med negative språkhaldningar, haldt Øvregård fram i talen sin.
Han kalte desse negative språkhaldningane for dumskap.
– Foreldra i Noreg som held ungane sine borte frå nynorsk tek språkgleda frå dei, meinte han vidare.
Øvregård peika vidare på at Noreg er fullt av slike språklege mistak, både i skule, offentleg forvaltning, høgare utdanning og arbeidsliv.
– Men det er viktig at vi ikkje forvekslar dette med vond vilje. For det er ikkje planlagd dumskap, sa han.
Diskusjonen om sidemål kalla han eit drap på gleda i å lære språk.
– Ei sjølvoppfyllande førestilling om elevane si manglande interesse for sidemål, som i dette ordskiftet konsekvent betyr nynorsk, reduserer elevane sin evne og vilje til å lære både nynorsk og bokmål i skulen, slo mållagsleiaren fast.
Han er ikkje samd med dei som seier at vi må endre norskfaget fordi vi ikkje har noko val og fordi det ikkje er muleg å innfri krava til å meistre både nynorsk og bokmål.
– Eg seier at dette er feil og fordummande. Vi veit at alle kan lære begge skriftspråka så lenge ein bryr seg om å leggje til rette for det, sa han i leiartalen.
– Det er eit enkelt val: Skal elevane lære meir, eller skal dei lære mindre, la han til.
Språkglede var stikkordet i leiartalen.
– Vi arbeider for språkglede. Lat han fløyme over landet, slutta Håvard B. Øvregård til stor applaus frå dei rundt 160 som var til stades på landsmøtet på Sand i Suldal kommune.
