I Røysmarka barnehage i Volda er dei med i prosjektet “Nynorsk i barnehagen”. Erfaringa så langt viser at barna er bevisste på språket og målformene.
Barnehagen innleia det språkstimulerande arbeidet i fjor med eit besøk i Ivar Aasen-tunet der dei mellom anna fekk lære mykje om Ivar Aasen. Dei tilsette i barnehagen har vore på seminar før prosjektet blei sett i gong, og barnehagen har fått utvida samlinga si av nye barnebøker på nynorsk.
Barna i barnehagen har samtalar om språket og om forskjellige dialektar. På denne måten har dei også blitt bevisste på at det er skilnader i ulike dialektar.
– Det er viktig å framheva at det er forskjell på nynorsk og bokmål. Slik vi pratar her på Sunnmøre, er talemålet mest likt nynorsk, seier Cecilie Vartdal til Nynorskopplæring, eit blad som blir gitt ut av Nasjonalt senter for nynorsk i opplæringa. Vartdal er pedagogisk leiar i Røysmarka barnehage.
Gjennom prosjektet “Nynorsk i barnehagen” får ungane mellom anna vere med og lage si eiga bok i Solsikkeklubben. Dei har arbeidd mykje med boka “liten-på-jord-Tor” av Annette Huber. Boka dei sjølv lagar handlar om Tor, men nå er han blitt mykje større. Det manglar ikkje på idear og engasjement frå dei fem år gamle barna.
– Eg er ikkje i tvil om at dette prosjektet har ført til at barna har blitt meir beviste på at det er forskjell på nynorsk og bokmål, sluttar Cecilie Vartdal.
I Ulsteinvik skal nå Aktiv barnehage byrje med «Nynorsk i barnehagen». Les meir om dette her.
