Er norske kommunar og fylkeskommunar for trufaste mot bankane dei samarbeider med, spør Bent R. Eidem, konserndirektør i Fokus Bank, i eit lesarinnlegg i Aftenposten.
– Ein skulle tru at dei økonomiske vinstane var så store for norske kommunar og fylkeskommunar at alle medvitne økonomisjefar og rådmenn var på hogget. Slik er det ikkje, sjølv om norske kommunar faktisk kan spare fleire hundre millionar kroner årleg på å arrangere anbodskonkurranse når dei skal velje bank, seier konsernsjefen.
Han nemner Meråker kommune, som byta bank etter å hatt den same i nesten 100 år.
– I 2011 byta Meråker kommune bank for første gong og fekk rundt 200.000 kroner meir å rutte med årleg, til glede for ungdom og idrettsliv i kommunen, fortel Eidem.
Meråker har 2500 innbyggjarar. Ein middels stor norsk kommune vil tene nærare to millionar kroner ekstra over fire år, ifølgje Eidem.
Norske kommunar og fylkeskommunar hadde bankinnskot på 69 milliardar kroner, seier tal frå Norges Bank frå mars 2010.
– Vi har rekna ut at renta for halvparten av desse innskota ville blitt 0,75 prosentpoeng høgare ved ein anbodskonkurranse. Det ville gitt kommunar med dårleg kommuneøkonomi ein årleg vinst på til saman 262 millionar kroner, slår konserndirektøren fast.
