Arne Moslåtten i Hellbillies er festspeldiktar for Dei nynorske festspela 2012 i Ørsta og Volda. Temaet for neste års festspel er “Songen”.
Det er første gong ein songlyrikar blir vald til festspeldiktar. Arne Moslåtten frå Hallingdal har skrive over 150 songar og tekstar på nynorsk.
– Moslåtten er ein framifrå vise- og songdiktar, song har gjort nynorsk og dialekt meir sjølvsagt, og songen spelar ei viktig rolle i samfunnet. Alt dette vil vise att i festspelprogrammet for 2012, seier programansvarleg Åshild Widerøe i ei pressemelding.
Arne Moslåtten er ikkje bare komponist og musikar, han er også musikklærar og rektor. Han speler fleire instrument, mellom anna fløyte, trekkspel og gitar. Han er utdanna faglærar ved Musikkonservatoriet i Bergen.
Hallingdølen sine songar blir omtala som sikre og presise i form og med eit tematisk mangfald med presise observasjonar frå norsk bygdeliv.
– Moslåtten sine tekstar er så litterære at dei er verd eit nærare studium, har norsklektor og sakprosaforfattar Sveinung Nordstoga uttala.
I 2008 fekk Arne Moslåtten Edvard-prisen for Hellbillies-albumet “Spissrotgang”.
Dei nynorske festspela 2012 har “Songen” som tema. Festspela blir arrangerte i Ørsta og Volda frå torsdag 28. juni til søndag 1. juli, med Ivar Aasen-tunet som hovudarena.
Det er førebels ikkje klart kva Moslåtten skal gjere under festspela, det blir fastlagt utover hausten og vinteren.
– Publikum vil få både det dei ventar og noko som overraskar. Festspela blir ganske ulike frå år til år med så ulike festspeldiktarar som vi har, seier Widerøe.
Tidlegare festspeldiktarar :
1994 Kjartan Fløgstad
1995 Halldis Moren Vesaas
1996 Paal-Helge Haugen
1997 Ragnar Hovland
1998 Jon Fosse
1999 Åse-Marie Nesse
2000 Rune Belsvik
2001 Brit Bildøen
2002 Einar Økland
2003 Marie Takvam
2004 Frode Grytten
2005 Edvard Hoem
2006 Olaug Nilssen
2007 Erna Osland
2008 Lars Amund Vaage
2009 Tove Bakke
2010 Rønnaug Kleiva
2011 Bjørn Sortland
2012 Arne Moslåtten
(Kjelder: Allkunne.no og Wikipedia)
