Nynorsk kultursentrum auka inntektene med 25 prosent i 2011, og direktør Ottar Grepstad kallar 2011 for det viktigaste året for nynorskinstitusjonen.
– 2011 blei det viktigaste året til nå for Nynorsk kultursentrum. Arbeidet med Språkåret 2013 kom godt i gang, Olav H. Hauge-senteret vann raskt tillit, vi utvida kontakten med andre land, styrkte Ivar Aasen-tunet og sette i gang nye prosjekt som involverer mange frå ulike miljø over heile landet, seier direktør Ottar Grepstad til Herøynytt.
Med sine 13 fast tilsette har Nynorsk kultursentrum ansvaret for ni ulike tiltak og medarbeidarar både i Ørsta, Ulvik og Oslo. Nynorsk kultursentrum stod i 2011 for 299 arrangement og utstillingar i 26 kommunar landet rundt.
Inntektene auka med om lag 25 prosent til nær 19 millionar kroner. 18 400 gjester og 250 000 unike nettstadbrukarar nytta tenestene frå Nynorsk kultursentrum i fjor. I desember runda dermed den nasjonale kulturinstitusjonen på Sunnmøre 3 millionar gjester og brukarar frå og med opninga i 2000.
– Vi fekk utteljing for det vi prioriterte i 2011, samstundes som vi fornya både arbeidsformer og planar, seier Grepstad vidare.
Han er særleg glad for at ideen om eit nasjonalt språkår i 2013 er blitt møtt med entusiasme i mange og ulike miljø. Om få veker får Kulturdepartementet framlegg til ein omfattande og ambisiøs prosjektplan for Språkåret 2013.
