Eit klart fleirtal ønskjer færre kommunar i Noreg, men ikkje der dei bur sjølv. Det kjem fram av ei undersøking som er gjennomført for KS.
Undersøkinga, som er utført av TNS Gallup, kartlegg haldningar til demokrati og styring både i befolkninga generelt og blant folkevalde i kommunar og fylke.
Eitt av tema er kommunesamanslåingar. Heile 65 prosent av befolkninga svarar at dei ønskjer færre kommunar. Men bare fire av ti ønskjer at kommunen dei sjølve bur i skal bli slått saman med nabokommunen.
Dei folkevalde er litt meir velvillige til kommunesamanslåingar: Sju av ti ønskjer færre kommunar, seks av ti kan også godta samanslåingar som gjeld kommunane dei sjølve er folkevalde i.
Men verken lokalpolitikarar eller folk flest vil ha tvangssamanslåingar. Eit klart fleirtal i båe gruppene meiner eventuelle kommunesamanslåingar må bli bestemt lokalt, ikkje av Stortinget, ifølgje undersøkinga. (NPK)
