Kjersti Moe er tilsett hjå Ryfylkemuseet på Sand i Ryfylke for å utvikle Lølandsenteret, eit nasjonalt barnekultursenter som er meint som eit resultat av arbeidet som blei lagt ned i Rasmus Løland-markeringa 2007 – 2011. No reagerer fleire på at Moe og Ryfylkemuseet dempar nokre av forventningane og legg vekt på at det vil ta tid å byggje opp senteret.
Les også: Å byggje Lølandsenteret vil ta tid
– Eg er glad for at Ryfylkemuseet har fått på plass ein person som nå skal arbeida vidare med etablering av Lølandsenteret. Eg forstår at dette vil vera eit langsiktig og strategisk arbeid, og meiner Ryfylkemuseet vil vera eit godt utgangspunkt for dette arbeidet. Samstundes er eg litt forundra over at museet synest å vilja dempa målsettingane, seier ordførar Myklebust.
Han forventar at museet har høge ambisjonar for Lølandsenteret som eit nasjonalt barnekultursenter og meiner det særleg er viktig å få ei nasjonal forankring av arbeidet vidare.
– Ryfylkemuseet og Lølandstiftinga har då og vore samde om at det skal opprettast eit nasjonalt råd som støtte til arbeidet. Restmidlar etter prosjektperioden er tiltenkt drift av dette rådet, legg han til.
Les også: I Løland sine fotefar
– Kommunestyret i Suldal skal i juni handsama sluttrapporten etter Lølandprosjektet. Eg reknar då med at kommunestyret vil understreka den viktige oppgåva Ryfylkemuseet nå har teke på seg for å få etablert Lølandsenteret i Suldal, seier Torkel Myklebust.
