Kommunal- og regionaldepartementet oppmodar no nynorskkommunar og –fylke om å søkje om å få bli Årets nynorskkommune 2012.
– Prisen skal stimulere til god nynorskbruk i kommunane, seier kommunal- og regionalminister Liv Signe Navarsete.
Prisen Årets nynorskkommune blir delt ut for fjerde gong i haust. Navarsete er oppteken av at det offentlege brukar nynorsk aktivt i tenestene sine.
– Nynorsk er ein viktig del av vår nasjonale kulturarv. Målforma har ein sentral plass i vår nasjonale litteratur. Nynorsk skapar identitet og nærleik. Ein nynorskkommune profilerer kommunen sin godt på nynorsk, seier statsråden i ei pressemelding.
Prisen Årets nynorskkommune vart innført i 2009. Prisen er på 100 000 kroner, og kommunane må sjølve søke om å få bli Årets nynorskkommune. Kriteria er at kommunen er aktiv på eitt eller fleire av desse områda:
– aktiv bruk og synleggjering av nynorsk i kommunale planar
– aktiv bruk av nynorsk i omdøme- og informasjonsarbeid. Dette kan vere heimesider, skriftleg informasjonsmateriell til innbyggjarane, opplegg for generell marknadsføring av kommunen, til dømes gjennom kurs og anna opplæring i nynorsk eller eigne retningsliner for nynorskbruk i kommunen
– god målbruk blant tilsette
– marknadsføring av nynorsk i kulturarbeid og kulturarrangement
– tidleg nynorskinnsats i barnehagar og barneskule.
Kriteria er utarbeidd av Kommunal- og regionaldepartementet saman med LNK. Søknadsfristen er 1. oktober 2012, og prisen blir delt ut i løpet av november.
Tidlegare vinnarar:
2011 – Fjell kommune i Hordaland
2010 – Seljord kommune i Telemark
2009 – Stord kommune i Hordaland
Les også:
