I midten av oktober blir det arrangert nynorsk barnebokveke i Møre og Romsdal. Forfattar Bjørn Sortland er ein av dei som skal reise rundt for å bleste den nynorske litteraturen.
Prosjektet er eit samarbeid mellom Ivar Aasen-tunet, Nynorsksenteret og fylkesbiblioteket. Janne Karin Støylen ved Nynorsksenteret og forfattar Bjørn Sortland besøker fleire av biblioteka i fylket i veke 42 og les frå og fortel om nynorsk barnelitteratur.
– Nynorsk er på mange område på vikande front, også i nynorskkommunane, og me ser at nynorske barnebøker er i mindretal. Dette ynskjer me å gjere noko med, seier Berit Hjertø ved fylkesbiblioteket i Møre og Romsdal.
Målgruppene i prosjektet er dei som jobbar med undervisning i skule og barnehage, og ikkje minst foreldra.
– Det er mange foreldre som ikkje veit kva nynorskbøker som finst der ute, seier Hjertø.
