Alle norske kommunar der det bur samar må få ansvar for å leggje til rette for samisk språk og språkopplæring, meiner sametingsrådet.
Ni kommunar har i dag eit spesielt ansvar for bevaring av det samiske språket. Eitt av verkemidla er at samisk og norsk er likestilte. Eit anna er at offentlege verksemder må kunne kommunisere på samisk.
No vil sametingsrådet, som er Sametingets regjering, leggje ned språkforvaltingsområdet. Det foreslår i staden at alle kommunar der det bur samar må leggje til rette for samisk språk og språkopplæring til alle som ønskjer det.
– Vi foreslår blant anna at alle elevar som ønskjer seg samisk opplæring skal få eit tilbod om det. Dagens ordning gir ei forskjellsbehandling mellom samar avhengig av kvar dei bur i Noreg, seier medlem av sametingsrådet Ellinor Marita Jåma til NRK.
I dag er det derimot stor mangel på lærarar som kan språket og som kan undervise i samisk. Medlem av sametingsrådet, Ellinor Marita Jåma, meiner det er realistisk å få på plass dei lærarane som trengst.
– Det er stadig fleire som lærer seg samisk, og det er fleire som ser kor viktig det er å kunne samisk, seier ho.
Dei ni kommunane der samisk og norsk er likestilte i dag er Nesseby, Tana, Karasjok, Porsanger, Kautokeino, Kåfjord, Lavangen, Tysfjord og Snåsa. (NPK)
