Mens kvar einaste grunnskule i Noreg har to skulekonsertar i året, er det meir tilfeldig kva elvane får av litteraturtilbod.
Begge delar høyrer heime i Den kulturelle skulesekken, som skal sørgje for at barn og unge får eit profesjonelt kunst- og kulturtilbod.
– Vi når ikkje alle skulebarna med litteratur. Det bør ikkje vere slik, seier fagleg leiar Vera Michalsen i Den kulturelle skulesekken. Tysdag var ho éin av vel 20 deltakarar på eit møte i Kulturdepartementet om leselyst. Kulturminister Hadia Tajik (Ap) hadde kalla til møtet for å starte arbeidet med å meisle ut ein felles strategi for leselyst retta mot barn og unge. Ho fekk klare råd om å ikkje berre satse på prosjekt, men satse meir langsiktig.
– Det skal eg ta med meg når vi lagar strategien. Målet er å komme tilbake med ein samla strategi før sommaren. Det trur eg er mogleg sidan det alt no er så mange som gjer mykje bra, seier Tajik til NTB. (NPK)
