Vossa Jazz er vinnar av LNK sin pris for offentleg målbruk. – Utruleg kjekt. Nynorsk er viktig for oss og vi er stolte av språket vårt, sa Kari Trana frå Vossa Jazz som tok imot prisen på landstinget til LNK i dag.
I grunngjevinga for tildelinga seier juryen:
– Hjå Vossa Jazz har det alltid gått på engelsk og nynorsk. I pressemeldingar, programomtalar, kontakt med det offentlege og internt har det alltid gått på nynorsk. I den hippe, urbane kunstforma jazz har Vossa Jazz gjort nynorsken naturleg. Gjennom eit alternativt vokabular og seiemåtar har Vossa Jazz greidd å verbalisera felles opplevingar slik at det kjennest naturleg og rett både for nynorsk- og bokmålsbrukarar. Eit godt døme kan vera at Vossa Jazz sin konsekvente bruk av nynorsk har ført til at mange bokmålsbrukarar i dag nyttar termen tingingsverk.
Vossa Jazz fyller 40 år i år, og juryen meiner festivalen står fram i den internasjonale festivalfloraen med ein sterk og særmerkt identitet. Nynorsken er ein sentral del av denne identiteten.
Trana, som er marknadsansvarleg, og ein av to tilsette i Vossa Jazz, seier dei bruker nynorsk som den største sjølvfølgje.
– Det er ikkje felt ned i vedtektene våre, eller skrive nokon plass eg har greidd å finne, at vi skal bruke nynorsk. For oss er det berre heilt naturleg.
Pris for god offentleg målbruk blir delt ut annakvart år til ei offentleg verksemd som arbeider med å fremje nynorsk eller til enskildpersonar som er markerte nynorskbrukarar i offentleg rom. Det er styret i LNK som er jury, og prisen er på 50 000 kroner og eit trykk av Ludvig Eikaas.
Prisen vart første gong delt ut i 1993, og han har tidlegare gått til Ullensvang herad, Vågå reiselivslag, Fylkesmannen i Rogaland, Odd Nordstoga, Lotteritilsynet, Peer Gynt-spelet, Hordaland Teater og Sogndal fotball.
