Ullensvang-ordførar Solfrid Borge er vald til ny leiar av Landssamanslutninga av nynorskkommunar.
Den nye styreleiaren meiner LNK har ei viktig rolle som haldningsskapar og pådrivar for at kommunane skal vere stolte av språket sitt, samstundes som at kommunane må bli meire bevisste nynorskbrukarar i framtida.
– Kommunane som barnehage- og skuleeigarar må vere klar over den rolla dei har, og vi meiner kommunane styrkar identiteten sin gjennom å bruke nynorsk i alt og eitt.
Å skape bevisste haldningar til språket er først og fremst eit leiaransvar i kommunane, meiner Borge, som er sikker på at LNK vil spele ei like viktig rolle hjå nynorskkommunane i framtida som dei har gjort i dei 20 åra som er gått sidan organisasjonen kom til.
Solfrid Borge har sete i styret til LNK sidan 2007, og tar no fatt på sitt første år som styreleiar. Borge er ordførar for Senterpartiet i Ullensvang herad. Ho har også vore leiar for det LNK-initierte prosjektet Diktarvegen.
Solfrid Borge avløyser Astrid Myran Aarvik, som har vore styreleiar i to år. Aarvik blir sitjande i styret til LNK. Den einaste nye i styret no blir Halvor Lilleslett, ordførar i Gol kommune. Han tek over i styret etter Laura Seltveit frå Sauda.
