Språkrådet er ikkje i tvil om at Haugesund Lufthamn må bruke meir nynorsk.
– Det saka gjeld, er kva målform Avinor skal bruka i allmenn informasjon på flyplassen. Grunnlaget for å avgjera at denne målforma er nynorsk, finn vi i mållova og vedtektene til Avinor, slik Samferdselsdepartementet slår fast, skriv leiar i Språkrådet, Arnfinn Muruvik Vonen i Haugesunds Avis.
Han viser til at vedtektene seier at Avinor skal følgje prinsippa i mållova i kunderetta informasjon, og at lova seier at institusjonar med eit avgrensa tenesteområde skal bruke fleirtalsmålforma i området. Fleirtalet av kommunane i det som må reknast som tenesteområdet for Haugesund lufthamn, er nemleg nynorskkommunar.
– Dette vil altså seie at Avinor må bruke den nynorske namneforma i skiltinga på flyplassen, men òg i skiltinga elles og i annan skriftleg informasjon. Språkrådet ser fram til at dette blir sett i verk.
