– Det finst argument mot sidemålet, men det er også veldig mange argument som held vatn, meinte Vebjørn Sture under Snnmørsseminaret.
For andre året på rad vart Sunnmørsseminariet arrangert denne helga i regi av Sunnmøre mållag. Ein av dei viktigaste årsakene til at seminaret vert arrangert er at målrørsla skal verte tryggare på sin eigen argumentasjon, skriv Møre – Nytt.
– Viktigaste grunnen til at vi arrangerer desse seminara er at det mange målfolk ofte grur seg til er å gå ut og argumentere. Det er vanskeleg, og ein krevjande argumentasjon fordi argumentasjonen mot nynorsk er veldig instrumentalistisk. Vi har ikkje bruk for det, og fleirtalet treng ikkje nynorsk og det kostar så mykje pengar. Sjølv i Ørsta så seier folk at Ivar Aasen er den dyraste mannen i Noreg si historie, og slike ting. Det som er føremålet med seminaret er at folk skal verte flinkare å argumentere for nynorsken, seier leiar Terje Kjøde i Sunnmøre mållag til Møre – Nytt.
Leiar i Norsk Målungdom, Vebjørn Sture har saman med Janne Nygård skrive boka ”Kva skal vi sidemål? Argument og fakta”, og gav deltakarane ein grundig gjennom gjennomgang av punkta som taler for sidemål, og mytane som taler mot.
– Det finst argument mot sidemålet, men det er også veldig mange argument som held vatn. Vi i målrørsla må også verte flinkare til å sparke ballen i angrep og tale vår sak først, i staden for å parkere bussen framfor mål kvar gang og vere defensive, seier Sture.
