Nybygget til Høgskolen i Bergen får både skilt og instruksjonstekstar på nynorsk. Det er verdt ein målpris, meiner Hordaland Mållag.
Til våren skal 7000 studentar og 700 tilsette ta i bruk det staselege nybygget til HiB på Kronstad. Rektor Ole Gunnar Søgnen fekk prisen frå Astrid Olsen, leiar i Hordaland Mållag, og Oddvar Skre, leiar i skulemålsnemnda.
Høgskolestyret gjorde vedtaket om skilting og instruksjonstekstar på nynorsk i mai 2012. Vedtaket gjeld for det nye undervisningsanlegget til 2.6 milliardar kroner som no snart står ferdig.
Høgskolestyret grunngir vedtaket med at det er i samsvar med likeverds-og jamstellingsprinsippet i mållova, dei meiner også at mange statsorgan skriv altfor lite nynorsk.
– Det er uheldig at staten på denne måten ikkje respekterer grunnleggjande lovkrav om mist 25 % nynorsk. Dermed vert også den nynorske målforma for lite synleg i det offentlege rommet, meiner Høgskolen.
Høgskolen i Bergen er den største og mest sentrale høgskolen på Vestlandet, og er ein viktig forvaltar av nynorsk kultur og språk.
– Med skilting på nynorsk vil høgskolen vere med å ivareta deler av det kulturelle mangfaldet i samfunnet som ein ellers verdset høgt.
