KLP kan visa til gode resultat for 2013 med god avkastning, låge kostnader og auke i talet på kundar.
For femte år på rad har KLP den beste verdijusterte avkastinga av selskapa som konkurrerer i den offentlege tenestepensjonsmarknaden.
Verdijustert og bokført avkasting i 2013 enda på høvesvis 6,7 og 6,4 prosent. Aksjar, eigedom og hold-til-forfall obligasjonar var dei viktigaste bidragsytarane til den gode avkastinga.
– For tilsette i offentleg sektor og kundane våre er det viktig å visa at me tek godt vare på pensjonsmidlane gjennom å levera gode resultat, seier konsernsjef Sverre Thornes i KLP i ei pressemelding.
Forventa levealder i folkesetnaden aukar. Det inneber at pensjonane skal utbetalast over lengre tid og medfører behov for å styrkja premiereserven. Alle forsikringsselskapa vil difor nytta ein stor del av overskotet til å styrkja reservane.
– Det er veldig gledeleg å kunne konstatera at me har så gode resultat i 2013 at me gjer oss ferdig med å styrkja vår premiereserve for å møte den positive utviklinga som ligg i at folk lever stadig lenger, seier Thornes.
KLP nyttar dei gode resultata sine innan offentleg tjenestepensjon til å styrkja premiereserven med 4,5 milliardar kroner fordi folk lever lenger, medan 5,9 milliardar kroner blir overført til kundane sine premiefond.
