Innovasjon Noreg må i år kutta 107 millionar, men selskapet skal ikkje leggja nokon distriktskontor.
Det går fram av ei pressmelding frå Innovasjon Noreg etter at styret denne veka har vedteke det endelege budsjettet for 2015.
Administrerande direktør Anita Krohn Traaseth i Innovasjon Noreg seier at selskapet er svært opptekne av å sikra relevant og spesialisert nærleik til kundane i dei nitten fylkeskommunane i landet.
– Dette krev eit meir strategisk, tettare og aktivt samarbeid med aktørane i regionen, seier ho vidare.
Ho legg ikkje skjul på at nedskjeringane på 107 millionar blir krevjande.
– Det betyr at vi, som dei fleste norske selskap, må gjera meir med mindre ressursar, seier ho.
42 prosent av kostnadskutta er knytt til nedbemanning og omfattar 60– 70 årsverk.
– Vi går mot ein krevjande vår i Innovasjon Noreg, men slik eg vurderer forbetringane til selskapet dei siste fem månadene, omstillingsevna- og viljen til dei tilsette, samarbeidet med styret og tillitsvalde, er vi godt skodde til å gå saman vidare i ein krevjande, men heilt nødvendig omstillingsprosess for å sikra og auka rolla til Innovasjon Noreg i omstilling av norsk økonomi, seier Krohn Traaseth. (©NPK)
