Erna Osland er årets festivaldiktar under den nynorske barnebokfestivalen Falturiltu på Stord. Første veka i november vert Falturiltu arrangert for tredje gong.
Målet med den nynorske barnebokfestivalen er blant anna å synleggjere dei mindre kjende barnebøkene. Spesielt vil festivalen fokusere på bøker som har noko nytt i seg, som provoserer i form eller tema, og bøker med uvanleg motiv og skrivemåte. Erna Osland frå Masfjorden er årets festivaldiktar. Osland vert rekna som ein av våre fremste barne – og ungdomsforfattarar og har sidan debutboka Natteramnen i 1987 gitt ut 25 bøker. Bøkene hennar syner stor sjangerbreidd, frå faktabok om fiskeoppdrett til teikneserie om Ivar Aasen, og fleire av bøkene er heidra med prisar, til dømes Brageprisen og Kritikarprisen. Til no er ho omsett til fem språk. Under Falturiltu-festivalen vert det òg ein litterær samtale mellom festivaldiktar Osland og Per Olav Kaldestad. Nokre av dei andre som vi kan oppleve på festivalen, er Hilde Myklebust, Helga Gunerius Eriksen, Atle Hansen og Ingelin Røssland.
