Per dags dato må 54 Robek-kommunar få budsjett og økonomiplanar godkjent hjå fylkesmannen.
Robek-registeret vart etablert i 2001 og er ei liste over kommunar og fylkeskommunar i økonomisk ubalanse. I tillegg til å godkjenna budsjett og økonomiplanar skal fylkesmannen også godkjenna alle vedtak om lån og langsiktige leigeavtalar for slike kommunar.
No er 54 kommunar registrerte som Robek-kommunar, ifølgje ei pressemelding frå Fylkesmannen.no. Elleve av desse kommunane ligg i Nordland fylke.
Møre og Romsdal har åtte kommunar på Robek-lista, mens Sogn og Fjordane har sju. Dei to Agder-fylka er dei einaste, i tillegg til Oslo, som ikkje har nokon kommunar registrerte i Robek.
Talet på kommunar i registeret har lege relativt stabilt sidan 2007. Toppen vart nådd i desember 2004 då 118 kommunar var Robek-lista. (©NPK)
