Forfattar Sigmund Løvåsen får Bjørnsonstipendet 2010.
– Bjørnsonstipendet 2010 er tildelt ein forfattar det er grunn til å ha betydelege forventningar til. Sigmund Løvåsen har gitt ut tre kritikarroste romanar, og vi ventar i spenning på det som skal kome, sa Randi S. Øgrey, direktør i Bokhandlerforeningen ved utdelinga av prisen.
Øgrey legg i ei pressemelding vekt på at årets stipendvinnar er ein stilsikker forteljar som gjennom sine romanar leiar lesaren gjennom eit landskap han kjenner godt.
Sigmund Løvåsen (f. 1978) er frå Trysil. Han debuterte med romanen Nyryddinga på Samlaget i 2003, ei bok han fekk både Tarjei Vesaas’ debutantpris og P2-lytternes romanpris for. Løvåsen er nestleiar i Den Norske Forfattarforening. Romanen Brakk, som kom i 2006, er ein frittståande oppfølgjar til Nyryddinga. Her møter vi igjen hovudpersonen Geir, ti år etter at Nyryddinga slutta. Begge desse bøkene er omsette til tysk og gitt ut i Sveits.
Bjørnsonstipendet er Bokhandlerforeningens forfatterstipend, oppretta i samarbeid med Den norske Forfatterforening og Bjørnsonfestivalen i Molde.
Tidligare har prisen gått til forfattarar som Karl Ove Knausgård, Johan Harstad, Carl Frode Tiller, Endre Ruset og Gunnhild Øyehaug.
