Nestleiar i SV, Bård Vegar Solhjell lanserer boka Solidaritet på ny i morgon føremiddag.
Boka er ei personleg farga historie om venstresida og det raudgrøne prosjektet si framtid og grunngiving, skriv Samlaget i ei pressemelding.
I morgon skal SV-nestleiaren ha pressekonferanse på Det Norske Teatret på føremiddagen, og same dag møter han Kristin Clemet til samtale på Tronsmo.
– Boka er eit oppgjer med konservative krefter i alle parti, og eit sterkt innlegg for fornying – i samfunnet, på venstresida og i SV. SV-nestleiaren skriv ærleg og innsiktsfullt om tvil og dilemma i store og små saker. Vi kjem på innsida av det raudgrøne prosjektet – ikkje i form av sladder, men gjennom refleksjonar rundt det å regjere. Solhjell peikar ut sin visjon og retning for dette politiske kompromiss-eksperimentet, men også for sitt eige parti SV, fortel Samlaget om boka.
Bård Vegar Solhjell (40) er frå Sunnfjord i Sogn og Fjordane, og er utdanna statsvitar. Han har vore nestleiar i SV sidan 2007, kunnskapsminister frå 2007 til 2009, sidan det parlamentarisk leiar for SV. Han er gift, har tre barn og bur i Son i Akershus.
