26 nye kommunar har nå blitt med i utviklingsprogrammet «Saman om ein betre kommune», eit prosjekt som skal hjelpe kommunane å betre omdømet.
Totalt 53 kommunar er nå med i programmet som skal vare i fem år. Kommunane er spreidde over heile landet og omfattar om lag 700 000 innbyggjarar.
– Nå får 26 nye kommunar bli med i «Saman om ein betre kommune». Dei skal jobbe med utfordringar som sjukefråvere og rekruttering. Kompetanse og arbeidstid blir også tema, seier statsråd Liv Signe Navarsete.
«Saman om ein betre kommune» er eit samarbeid mellom Kommunal- og regionaldepartementet, KS og forhandlingssamanslutningane.
– Interessa har vore stor. Dei mange gode prosjekta kan skape dynamikk og engasjement for fornying i kommunane. Et trur dette vil gje idear og kunnskap som kan kome heile sektoren til gode, seier kommunal- og regionalminister Liv Signe Navarsete.
Nokre av dei 53 kommunane som er med i utviklingsprogrammet er mellom andre Drammen, Kvinesdal, Finnøy, Rennesøy, Karmøy, Stavanger, Molde, Vefsn, Tinn. Dei første kommuanne blei tatt opp i prosjektet i september i år, medan dei nye blei med nå i november. Neste haust er det planar om at endå fleire kommunar skal bli med i programmet.
